Iba't ibang mukha ng prostitusyon ngunit isa lamang ang ugat... KAHIRAPAN.

Martes, Agosto 30, 2011

Indayog

Bawat sinag at kutitap ng pulang ilaw-dagitab,
Balaraw na tumitimo sa dibdib niyang nawawasak
Sa himig at lamyos ng maharot na musika
Unti-unting iindayog, malalaglag
Papalayo sa maalindog nyang katawan
Ang nalalabing dignidad na pinaka-iingatan
Nakakasilaw ang kinang ng mga ilaw
Na naghahantad sa kanya sa kahihiyan
Kasing-kinang ng mga salaping papel
Na isa-isa nyang pinupulot, matapos
ang bawat pagtatanghal.

Hanggang kailan siya iindak,
Hanggang kailan siya iiyak?
Hanggang kailan mahihiga
Sa tabi ng mga buwitre’t asong gala;
hayok sa laman at handang sumila?

Dilim sa gitna ng liwanag. May luha,
Sa bawat sulok ng parisukat na mundong kinasadlakan.
Sadya nga bang sa bawat tao’y may musikang nakalaan.
Na sa gitna ng pagluha, kailangan niyang isayaw

Ang indayog ng buhay?


Walang komento:

Mag-post ng isang Komento